2Th 2 | KZE | STEP | kentáásí kwaásiyono. kentáásí Ísóigo Ísu Káráísiti kuména kuntorupásinkainata kweséya ménaunda-ainta avoraꞋá simátimenaumne.

2 Thessalonians 2

sáwí-mayaigombo avowáíꞋo owáíná kwaasái.

1 kentáásí kwaásiyono. kentáásí Ísóigo Ísu Káráísiti kuména kuntorupásinkainata kweséya ménaunda-ainta avoraꞋá simátimenaumne. 2 évakarawai sésa Ísóigo Ísu áꞋa kunkáiye siráan-aimba íma anón-imayaa íyana tirunkó sáwíꞋa íno. mináímbó simátímakaawai kentí imáyáavinkena sirá. mirámó sembá Áánútu simásímakaiye sirá. kentávésa aúváívinkemba simásímakaiyewa sirá. náávaken-ainewa siráao. 3 minkámpár-áímbá kwésimatimewaꞋa áraiꞋa siyé seváímpóꞋa maanáímbá avoraꞋá simátimenaumpo ísáaro. Ísóigo Ísu kumíní-tawai íma úwoi kumínívo aivaꞋá sáwívarawai Áánútumba tínaaemba umámiyana sáwí-mayaigomba avowáíꞋa uráiwai sáwí-marupaꞋo iramó kaíkaiꞋo kwéipaꞋo kumbéniwainonkaamba paáriniye. 4 évaka-tantaatavesamo kwaásimo sésa kesí ísóigoman-iye sésa mintántáákóná imáyáa mósá kwémaraambo éna aambá aunéna séna úwoisan-tantaaꞋan-ivo keyáá anómba úne séna Áánútuna monoꞋ-náúmpáꞋá uména kampaꞋá séna kemá Áánútu úne síníye.

5 keinárawate maéwándaraꞋa mináímbá simátímakaunda ímo tuwinkaráámbá tuwinkaráawe. 6 ívéꞋa sáwí-mayaigomba avowáíꞋa uráiwaimba aambá ítánkaraimba kwéisaawe. Áánútu séna sáwí-mayaigomba avowáíꞋa uráiwaina kanaamá kwétiye sínda-tawai mindáꞋá paáriniye. 7 ívéꞋa sáwísawaa-mayaima aúpáꞋá kwémayaawana sáwí-mayaigomba avowáíꞋa uráiwaimba aambá tawísíyankainana paáríndaraꞋa sáwísawaa-mayaima avoraꞋá paárínana 8 sáwí-mayaigomba avowáíꞋa uráiwaigwaraꞋa paárínana Ísóigo Ísu ságayankwaraꞋa kuména ááma áútinkena inkaména kwená asirayámbá maisuwáníye. 9 sáwí-mayaigomba avowáíꞋa uráiwai paáríndaraꞋa Sáátáánigona asirayánkwáráꞋá paáréna óꞋon-oꞋom-bayai ímo awánaraam-bayai kampaꞋ-máyáí kwémaena 10 óꞋon-oꞋon-tantaatavena kampar-áímbá simátiminasa sáwí-meyambo kwaíkwaiꞋo ínín-ayampaꞋo koménaaon-kwaasi mináíntávésa áraire sénááowe. árair-aintavesa íma aamoí íyamba Áánutu sáwí-imayaaomo tátokaimpinkemba iyátínkáiwain-aaiyavesa íma aamoí íyamba póna Áánútu íma kawer-ámpáꞋá métinkaniye. 11 mirá-sáwí-kwáásí pósa minkámpár-áíntávésa áraire sénááowe. mirá-sáwí-kwáásí póna Áánútu étinkainana kampar-áínkó miwí asiramái tátorainasa kampar-áíntávésa árair-aimban-iye sénááowe. 12 miráumai árair-aintavesa kampar-áíné sésa sáwíꞋo kwéontavesa aamoí íyawai sáwí-meyamba timíníye. kemá Póro séꞋa aivaꞋá sáwí-mayaigomba avowáíꞋa uráiwai paárínana Ísóigo Ísu kuména inkaména kwená asirayámbá maisuwáníye.

asiramái máyáan-kwasai.

13 kentáásí kwaásiyono. Ísóigo arumbá kwétimiye. aivaꞋá Áánútu keinárawatavena séna sáwí-imayaaomo tátokaimpinkemba iyátinkeꞋa kawer-ámpáꞋá métinkanaumne séna kwenamambá aiꞋmarówana Áánútuna kwaási-iꞋa kunumátinkowaꞋa árair-aintaveꞋa áraire siráantaveta aasiyaasí ÁánúntumpaꞋa súwiya kwésimankaumne. 14 áséi-kwasai kosimátimewananaya kwená kwaási-iꞋa umátinkainaꞋa Ísóigo Ísu Káráísiti ságayankwaraꞋa máyáipaꞋa uménaaontavena Áánútu tááyaraiye. 15 mindáyaveꞋa asiramái méꞋa kosimátímakaunda-aine aúváívimba agairáunda-aine tirumpimbá tátoraaro.

16 Ísóigo Ísu Káráísitiye Áánútu kentáásivowawe kentáásí imáyáa ésarai úwoi súwaꞋnaa esarai aasiyaasí kentáásí imáyáa kaweꞋá kwéumasinkaayata Ísu Káráísitiye ménaundayaveta kwéamuꞋmaraundayaawe. 17 Ísóigo Ísu Káráísitiye Áánútu kentáásivowawe kentí imáyáa kaweꞋá umátinkesarai asiramátinkaiyamba póna kentí mayáíyé kentááiye kaweꞋá íníntaveta námúnaa kwésune.